Удмурт кыл дуннеын шокчи

Дарали Лелилэн ӧтеменыз милемлы одӥг но ӝыны нуналлы удмурт кыл лагере шедьыны шуд усиз. Ижысен Вуж Сальяла милемыз Леонид Гонин нуиз. Со понна бадӟым тау солы. Пыриськимы удмурт кылэз дышетонлы сӥзем Выжы ассоциацилэн семинараз. Со туала активо форматын ортчиз, кылэз дышетонлэн юбоосыз пумысен тэкшеримы. Ваньмы огкылэ вуимы, валтӥсез - со кыл вӧлмет/кыл дунне, сотэк кыл дышетонлэн емышъёсыз уз луэ. Сэре кылэз дышетон мылкыд но туала активо но стандарттэм амалъёсты уже кутон. Со сяна тросэз методика книгаосты огъя возённилэсь кулэлыксы пусйиз. Куспамы сое «методической банк» нимамы. Докладме лэсьтӥ, Коми Элькунысь Саша мачкиз милемлы, отысь кивалтӥсьёс, коми луисьтэмъёс но, коми кыллэсь дунлыксэ валало шуыса. Коми кыл Коми Республикалэн кунлыкезлы инъет сётэ ук, школаосын солы дышетон та инъетсэ золомытэ, кужмоятэ. Коми кылтэк, кун кыл статустэк республиказылэн но ичигес луонлыкез луоз асьсэлэсь нимаз кун статуссэ утьыны.

Эшъёсыным пумиськонъёслы юн шумпотӥ: Дарали Лелиен, Крестьянинова Алинаен, Бурдо Оксиен, Решетникова Ангелина Ефремовнаен, Лекомцева Женяен, Федоринчик Артёмен. Выль тодматсконъёслы но юн шумпотӥ: вань лагере пыриськисьёслы (уката ик Чуваш Кунысь лыктэм семьялы, пурысьтам Серов карысь Лизалы, Лизапайлы, Какможысь пиналъёслы), Сальядор кунокуалэн кузёезлы Алёналы, Вуж Сальялась адямиослы – Анналы, Аркадийлы.

Урокъёс но лекциос вискын пиналъёсын футболэн шудыны удалтӥз. Жаляса верано, вормисе потыны ӧзгес пишмы, Какможын (Вавож ёросысь гурт) тужгес но зол тыпӵыжасьёс уло вылэм, угось (отысь вожвылъяськисьёсы – Ӧрӟи Митрей но Атас Ортёми – вал).

Ӝытазе Олилэн берыктон но кино сессиез вал. Со кык удмурт субтитыръёсын венгер фильм возьматӥз. Нырысетӥез – Оскар премиез утэм «Котькин» нимо вакчи фильм. Бахтинлэн верамезъя, фильм о силе поступка, огшоры адямилэн самой огшоры улон югдураз. Кыктэтӥез мультфильм – «3 нэнэе». Юн чебер графикаез но анимациез, аспӧртэмлыко мадён манерез но геройёсызлэн улон сюресъёссы. Лагерьын со вакытэ зэмос удмурт кинотеатр вал – туала кунгожсьӧрысь фильмъёсты удмурт кылын учкимы. Удмурт филология факультетысь студентъёс со фильмъёслы удмурт титръёсты дасязы. Соос текстъёсты меӵак мадьяр кылысь удмурт кылэ берыктӥзы, ӟуч кылэ выжытэк. Со пиналъёслы бадӟым тау, соостэк, Олилэн юртэммезтэк, Сираки Жофилэн (университетысь венгер кыл дышетӥсьсы) мылкыдызтэк Ижын но Сальядорын со фильмъёсты ӧй учкысалмы. Со фильмъёсты возьматыкуз, мон удмуртэз ляб тодӥсь пыриськисьёслы титръёсты берыктылӥ.

Фильмъёсты возьматэмез бере Оли берыктон шуг-секытъёс сярысь мадиз. Студентъёслэн берыктонысьтызы тужгес но ӵем пумиськись янгышъёссэ но шуг интыоссэ возьматӥз но соослы комментариос сётӥз. Со янгышъёс пӧлын – грамматика дыръёсты шонертэм уже кутэмез, «луыны быгато» «лэсьтэмез луэ» интые уже кутэмез, мугор люкетъёсты нимаку асэстэм (лично-притяжательной) суффиксэз уже кутымтэ манерез, тупан вошъетэз мултэс, тупасьтэм интыосын уже кутылэмез (математикая урок интые математикаен урок шонергес луоз). Малпамея, та семинар вань берыктӥсьёслы но удмурт кылэн вырисьёслы туж пайдаё вал.

Киноберыктон сесси бӧрсьы шутэтскимы, вуоно проектъёс сярысь вераськимы, сэре удмурт но мукет финн-угор калыкъёслэсь кырӟанъёссэс шулдыр кырӟамы. Арганэн милемлы Наумова-Гиреева Антонина Анатольевна задор шудӥз. Антонина Анатольевна Вуж Сальялась «Бӧляк» ансамбльлэн кивалтӥсез. Макем со лякыт но сэзь! Гуртысьтыз вайиз милемлы губинча, пӧсь перепеч, сутэр но эмезь. Изьыны выдэммы азьпал Терентьев Сашаен коми мафиен ӵыдытэк шудӥмы. Дарали Лелиен татчыозь мон ноку но шудылымтэ. Вунонтэм экспириенс со. Базмондэс эн ыштэлэ! Огшоры мафиен шудыны уггес яратӥськы, нош комиез туж кельшиз. Оли Алинаен шудыкузы монэ весь утизы, нош Яр Чаллаысь Ники – вузалляз но куштылӥз.

Вуоно ӵукна Дарали Лелилэн группаяз уроке ветлӥ. Группаяз адямиос тунсыко упражнениосты быдэстыса дышетско, быгатонлыкъёссэс волято. Дарали мадьяр кылысь удмуртэ берыктэм текстэз экскерыны но тупатыны сётӥз. Со чеберлыко литература. Туала мадьяр синтаксис удмуртэзлэсь юн пӧртэмъяське бере, со берыктонэз умоятон туж шуг усиз. Ваньмы тыршимы, со текст капчи но валамон мед луоз но со дыре ик автор кыллэн спецификаез но мед кылёз шуыса. Со упражненимы юн пайдаё вал, малпасько егит берыктӥсьёслы но журналистъёслы со выллем семинаръёс луысалзы ке, гожъяськон кылзы трослы чебермысал.

Лагерьын юн ӟеч атмосфераез, программаез туж тунсыко но турлы – трос йӧно экспертъёс но спикеръёс мадьыны кулэ. Ватсало на, со лагерьлэн форматэз чувашъёслэсь «Хавал» нимо лагерьлэсь асэстэмын – калыкъёслэн ӵошужамзылэн ӟеч примерез. Я, соос финн-угоръёслэсь этнофутуризмес асэстӥзы бере, ми коть кыл лагерьмес соослэсь адӟем карыса радъялом.
Женя Лекомцевалы, Дарали Лелилы, Арцём Федоринчиклы, Дмитриева Наташалы, Алина Крестьяниновалы, Бурдо Оксилы, Сальядорысь кузёослы но ужасьёслы, Вуж Сальялась вань юрттисьёсызлы йыбырттӥсько. Соостэк ваньмыз фантазиын, улонэ пыӵатытэк, кыльысал.

Туспуктэмъёслэн авторзы: Шкляев Олёш, Урасинова Оли, Гонин Леонид